Poslovne vijesti - Makedonija

37% од компаниите во Македонија се бават со трговија

Од вкупно 74.424 компании коишто биле активни заклучно со последниот ден од минатата година, во Македонија има само 335 компании (0,45%) што влегуваат во категоријата големи, односно вработуваат над 250 луѓе.

Според Државниот завод за статистика, во македонската економија доминира бројот на микрокомпании со број на вработени од едно до девет лица и тие се 53.117 или 72%. Следуваат малите (10-49 вработени) со 8.833 и средните (50-249) со 631 активни компании во 2012 година.

Најголем број од компаниите (37%) се од дејноста трговија на големо и на мало, а меѓу првите пет економски сектори според бројноста на компаниите е преработувачката индустрија со 8.251 компанија, транспорт и складирање со 6.445 компании, стручни, научни и технички дејности со 5.707 компании и објекти за сместување и сервисни дејности со храна со 4.611 компании.

Во Скопје, со население од околу една третина од вкупната популација на Македонија, се наоѓаат 36,5% од вкупниот број активни компании во земјата. Во Скопје се наоѓаат 34% од микрокомпаниите, 43% од малите, половина од средните и дури 70% од големите компании во Македонија.